Ինչպե՞ս կարդալ և հասկանալ վարկային զեկույցը

Ենթադրենք, թե վարկատուն Ձեզ ասել է, որ վարկ ստանալու համար անհրաժեշտ` ռիսկի գնահատման գործընթացի մի մասն է կազմում նաև վարկային բյուրոյից Ձեր վարկային զեկույցի հարցումը, և որ վարկային զեկույցն անհրաժեշտ է Ձեր վարկային անցյալին ծանոթանալու և սխալները ճշտելու համար:

Սակայն վարկային զեկույցը ստանալով` Դուք տեսնում եք, որ այնտեղ կան բազում թվեր, հապավումներ և տերմիններ, որոնք Ձեզ ոչինչ չեն ասում:

ԱՔՌԱ վարկային բյուրոյի կողմից տրամադրվող վարկային զեկույցը բաղկացած է երեք մասից. անձը նույնականացնող տվյալներ, վարկային պատմություն և վարկային զեկույցի հարցման վիճակագրություն:

Անձը նույնականացնող տվյալները օգնում են ստուգել Ձեր ինքնությունը: Շատ անգամ նույն անունը կարող է գրվել մի քանի եղանակով կամ կարող են լինել անձնագրի և սոցիալական քարտի` մեկից ավելի համարներ: Դա պարզապես կարող է լինել տարբեր աղբյուրներից ստացած տեղեկությունը նույնությամբ տեղադրելու հետևանք: Չարժե անհանգստանալ նման դեպքում: Պետք է միայն զգուշացնել վարկային բյուրոյին:Անձը հաստատող տվյալների մեջ մտնում են նաև ընթացիկ և նախկին հասցեները, հեռախոսահամարը, Ձեր ծննդյան օրը, ամիսը և տարեթիվը:

Երկրորդ մասը վարկային պատմությունն է: Այստեղ զետեղվում է վարկատուի անունը, վարկային հաշվի համարը, ինչպես նաև`

• վարկի տրամադրման ամսաթիվը(վարկային հաշվի բացման ամսաթիվը),


• վարկի տեսակը,


• վարկի ողջ գումարը կամ հասանելի գումարի չափը,


• ամսական նվազագույն վճարի չափը,


• վարկի ներկա կարգավիճակը (ակտիվ, փակված, լիովին վճարված և այլն),


• ֆինանսական պարտավորությունների կատարման ընդհանուր պատկերը:

Վերջին բաժնում տրվում է ձեր վարկային զեկույցի հարցումների վիճակագրությունը: Նշվում են Ձեր վարկային զեկույցը երբևէ պահանջած անձանց և կազմակերպությունների անունները: Հարկ է նշել, որ այդ անունները արտացոլվում են միայն վարկային զեկույցի` Ձեզ տրվող օրինակում:

Եթե Ձեր վարկային զեկույցում սխալ եք հայտնաբերել, լրացրեք զեկույցին կից դիմումը` հետևելով բացատրական ցուցումներին:

Վիճարկվող ինֆորմացիայի ճշտումը կարող է ժամանակատար լինել, քանզի վարկատուները ունեն 15-40 օր այն ճշտելու համար: Քանի դեռ տվյալը բողոքարկման գործընթացի մեջ է, վարկային զեկույցը անպայման կարտացոլի այդ փաստը: