Վարկային բյուրոյի ծառայությունների կարևորությունը

ԱՔՌԱ վարկային բյուրոն երկրում բարձրացնում է ֆինանսական կարգապահությունն ու նվազեցնում վարկային և գործարար ռիսկի մակարդակը` շուկայի մասնակիցներին տրամադրելով ֆիզիկական և իրավաբանական անձանց վարկարժանության մասին տեղեկություն:

Ժամանակակից վարկային բյուրոյի առկայությունը ֆինանսական հաստատության համար նվազեցնում է հաճախորդի ռիսկայնության գնահատման ժամանակը և ծախսը: Այդ կառույցը օժանդակում է նաև ֆինանսական ոլորտում վարկային ռեսուրսների առավել օպտիմալ տեղաբաշխմանը և խթանում վարկավորման ծավալների աճը:

Այդպիսով, ԱՔՌԱ վարկային բյուրոյի հետ գործակցության արդյունքում ֆինանսական հաստատությունները հնարավորություն են ստանում

• առավել տեղեկացված լինել իրենց հաճախորդների ռիսկայնությանը` ունենալով տեղեկություն նրանց ֆինանսական պարտավորությունների կատարման կարգապահության, և ներկա վարկային պարտավորությունների մասին,
  
• կարճ ժամանակում  ճանաչել ցածր ռիսկայնություն ունեցող հաճախորդներին,
  
• արդյունավետ դարձնել ֆինանսական գործարքների կատարումը,
  
• մշտապես տեղեկացված լինել ֆինանսական պարտավորությունների նկատմամբ անպարտաճանաչ վարկառուների մասին,
  
• վայրկյանների ընթացքում ստանալ պոտենցիալ հաճախորդների վարկային պատմությունն արտացոլող զեկույց` խնայելով ծախսն ու ժամանակը,
  
• զգալիորեն նվազեցնել վարկերի և ապառիկ պայմաններով կատարվող գործարքների տոկոսադրույքը` իջեցնելով վարկավորման ռիսկերը,
  
• առավել տեղեկացված լինել երկրում և երկրի սահմաններից դուրս գործող պոտենցիալ գործընկերների մասին,
  


• նվազեցնել ֆինանսական դաշտի վարկային ռիսկը: ԱՔՌԱ-ի ակտիվ կրթական-տեղեկատվական արշավը հասարակությանը կտեղեկացնի, որ բանկը համագործակցում է այնպիսի կառույցի հետ, որի միջոցով յուրաքանչյուր անձ հնարավորություն է ստանում կերտել իր սեփական վարկային պատմությունը  և օգտագործել այն որպես ծանրակշիռ ակտիվ ֆինանսական ծառայություններից օգտվելու ճանապարհին: Այսպիսով, ցանկացած սուբյեկտ սկսում է առավել կարգապահ լինել ֆինանսական հաստատության նկատմամբ ստանձնած ֆինանսական պարտավորությունների կատարման հարցում: Արդյունքում հասարակության մեջ ձևավորվում է ԴՐԱԿԱՆ ՎԱՐԿԱՅԻՆ ՊԱՏՄՈՒԹՅՈՒՆ ստեղծելու գիտակցությունը` որպես ֆինանսական պարտավորությունների կատարման լրացուցիչ խթան:
  

Ֆինանսական հաստատություններից բացի, վարկային բյուրոյի ծառայությունները էական նշանակություն ունեն նաև անհատների համար, որոնք հնարավորություն են ստանում

• կառուցել, բարելավել և ֆինանսական գործարքներ իրականացնելիս օգտագործել իրենց վարկային պատմությունը,
  
• օգտվել վարկերից ու կնքել ապառիկ հիմունքներով կատարվող գործարքներ,
  
• խնայել իրենց անցյալը և ռիսկայնության աստիճանը հաստատող փաստաթղթերի ձեռքբերման համար ծախսվող ժամանակը և ծախսերը,
  
• մշտապես իրազեկ լինել սեփական ֆինանսական պարտավորությունների կատարման ընդհանուր պատկերին: Դրա արդյունքում սպառողը դառնում է զգույշ և կարգապահ` կարողանալով առավել ճիշտ կառավարել իր ֆինանսական միջոցները,
  
• սեփական վարկային պատմությունը օգտագործել որպես ծանրակշիռ ակտիվ բարենպաստ պայմաններով (ցածր դրույքի և գրավի առկայություն) ֆինանսական գործարքներ կատարելիս: